Հաճախ եք նկատել, որ մազերը դարձել են անփայլ, չոր, փխրուն կամ դժվարությամբ են հարդարվում։ Շատերը լուծումը փնտրում են մակերեսային յուղերի կամ սովորական շամպունների մեջ, սակայն իրական խնդիրը գրեթե միշտ թաքնված է մազի կառուցվածքի ամենակարևոր պատնեշում՝ կուտիկուլայում։

Ի՞նչ է մազի կուտիկուլան և ինչո՞ւ է այն կարևոր

Կուտիկուլան մազի արտաքին, բնական պաշտպանիչ շերտն է։ Միկրոսկոպի տակ այն նման է  ձկան թեփուկների, որոնք հերթականությամբ ծածկում են մազի ներքին կառուցվածքը (կորտեքսը)։

Երբ մազը առողջ է, այդ «թեփուկները» սերտորեն հպված են իրար, հարթ են և անթերի։ Առողջ կուտիկուլան մազին օգնում է պահպանել՝

• Խոնավությունը՝ թույլ չտալով մազին չորանալ,

• Բնական փայլը՝ հարթ մակերեսը հայելու նման արտացոլում է լույսը,

• Ամրությունն ու առաձգականությունը,

• Գույնի ինտենսիվությունը (հատկապես ներկած մազերի դեպքում)։

Ի՞նչն է հանգեցնում կուտիկուլայի վնասմանը

Ամենօրյա կյանքում մենք հաճախ անգիտակցաբար վնասում ենք այս նուրբ շերտը։ Գլխավոր թշնամիներն են՝

1. Ջերմային ագրեսիվ ազդեցությունը

   Ֆենով շատ տաք օդով չորացնելը, հարթուկների  և գանգրացնող սարքերի հաճախակի օգտագործումն առանց պաշտպանության։

2. Քիմիական միջամտությունները

   Մազերի գունաբացումը, ագրեսիվ ներկումը, երկարաժամկետ գանգրացումը կամ քիմիական հարթեցումը բացում են կուտիկուլայի շերտերը և քայքայում կապերը։

3. Մեխանիկական վնասվածքները

   Չոր կամ խճճված մազերը կոպիտ սանրելը, սխալ ընտրված սանրերը և սրբիչով մազերը կոպիտ շփելը։

4. Անհամապատասխան խնամքի միջոցները

   Ագրեսիվ, սուլֆատներով հարուստ մաքրող շամպունները, որոնք լվանում են մազի բնական պաշտպանիչ լիպիդային շերտը։

Ի՞նչ է տեղի ունենում, երբ կուտիկուլան վնասվում է

Երբ արտաքին թեփուկները բարձրանում են, կոտրվում կամ քայքայվում, մազի ներքին շերտը մնում է լիովին անպաշտպան.

• Առաջանում է խորը չորություն
  Վնասված մազը չի կարողանում պահել խոնավությունը, կորցնում է փափկությունն ու դառնում կոշտ։

• Հակվածություն կոտրվելու
   Մազը կորցնում է ճկունությունը, հեշտությամբ կոտրվում է սանրելիս, և առաջանում են ճյուղավորված ծայրեր։

• Փայլի կորուստ
   Քանի որ մակերեսը դառնում է անհարթ, լույսն այլևս չի արտացոլվում, մազերը ստանում են խամրած  տեսք։

• Գույնի արագ կորուստ
  Ներկի պիգմենտները շատ արագ մաքրվում են բաց մնացած ծակոտիներից։

Ինչպե՞ս պահպանել և խնամել կուտիկուլան

Որպեսզի Ձեր մազերը միշտ լինեն առողջ, փայլուն և ամուր, հետևեք այս պարզ, բայց վճռորոշ կանոններին՝

• Անհրաժեշտության դեպքումվօգտագործեք ջերմապաշտպանիչ
  Ֆենով կամ հարթուկով աշխատելուց առաջ անպայման կիրառեք ջերմապաշտպան սփրեյ կամ կրեմ։

• Նուրբ սանրեք
   Սկսեք ծայրերից՝ աստիճանաբար բարձրանալով դեպի արմատները։ Խուսափեք թաց կամ չոր մազերը բռնի ուժով քաշելուց։

• Ընտրեք մեղմ մաքրող միջոցներ
   Նախապատվությունը տվեք մեղմ, առանց սուլֆատի կամ մազի տեսակին ճիշտ համապատասխանեցված շամպուններին։

• Խորը խոնավացում և սնուցում
   Պարբերաբար օգտագործեք կուտիկուլան հարթեցնող դիմակներ, կոնդիցիոներներ և յուղեր։

• Պարբերական խնամք.
  Ժամանակին կտրեք վնասված ծայրերը, որպեսզի ճյուղավորումը չտարածվի մազի ամբողջ երկարությամբ։

Հիշե՛ք
 Առողջ մազը սկսվում է առողջ կուտիկուլայից։ Պաշտպանելով մազի արտաքին շերտը՝ Դուք պահպանում եք նրա բնական գեղեցկությունը, մետաքսյա փափկությունն ու փայլը։