Ասեղային մազահեռացումը, անկասկած, մազերից վերջնականապես ազատվելու ամենաարդյունավետ մեթոդներից է, սակայն այն պահանջում է բացառիկ պրոֆեսիոնալիզմ մասնագետից և անթերի հետխնամք հաճախորդից։ Երբ խոսքը վերաբերում է դեռահասներին, վտանգներն ու պատասխանատվությունը կրկնապատկվում են, ինչն էլ ակնհայտ դարձավ իմ հետևորդներից մեկի ներկայացրած բավականին բարդ ու ուսանելի դեպքից։

Դեպքը վերաբերում է դեռահաս հաճախորդին, ում այտերի և ականջամերձ հատվածում իրականացվել էր ասեղային մազահեռացում՝ յուրաքանչյուր կողմում մոտ 15 րոպե տևողությամբ։ Սակայն մինչ միջամտությունը մաշկն արդեն իսկ ունեցել է ակնեի նշաններ։ Անմիջապես միջամտությունից հետո դեռահասը մոտ երկու ժամ գտնվել է բաց արևի տակ, ակտիվ խաղացել, քրտնել, իսկ երեկոյան մաշկը չի ախտահանվել և չի լվացվել։ Արդյունքում, 3-4 օր անց ի հայտ է եկել սուր բորբոքային պրոցես։ Իրավիճակն ավելի է բարդացել ոչ մասնագիտական խորհրդով ցինկի մածուկ կիրառելուց հետո, ինչի հետևանքով առաջացել են թարախային կեղևներ, տեղային հյուսվածքների hyperthermia (ջերմության բարձրացում)։ Խնդիրը պահանջել է մաշկաբանական միջամտություն և համակարգային հակաբիոտիկոթերապիայի կորեկցիա ու դոզավորման բարձրացում։

Ինչո՞ւ ստացվեց նման պատկեր. հիմնական պատճառագիտական սխալները

• Ակտիվ ակնեով մաշկի ընտրությունը․ Դեռահասների մոտ ճարպագեղձերի գերակտիվության և հորմոնալ ֆոնի պատճառով ակնեն ինքնին հանդիսանում է պաթոգեն բակտերիալ ֆլորայի  աղբյուր։ Ասեղային մազահեռացման ընթացքում էլեկտրոդը ներթափանցում է մազարմատ՝ ստեղծելով միկրոտրավմաներ, որոնք ակտիվ ինֆեկցիայի առկայությամբ հեշտությամբ վերածվում են բակտերիալ տարածման դարպասների։

• Արտաքին գործոններ ․ Անմիջապես միջամտությունից հետո արևի ճառագայթումը, քրտնարտադրությունը և օդափոխության բացակայությունը ստեղծում են իդեալական թերմոստատիկ միջավայր բակտերիաների բազմացման համար։ Երեկոյան պատշաճ խնամքի բացակայությունը թույլ է տվել, որ փոշին և քրտինքը լցվեն բաց մազարմատային անցքերի (ֆոլիկուլյար ուղիների) մեջ։

• Ոչ ադեկվատ տեղային թերապիա․ Սուր թարախային բորբոքման փուլում   յուղոտ հիմքով միջոցների, այդ թվում՝ ցինկի մածուկի կամ յուղոտ հակաբիոտիկային քսուքների անհարկի կիրառումը։

Ինչպես կանխարգելել նման բարդությունները. պրոֆեսիոնալ արձանագրություն

Մասնագիտական տեսանկյունից սուր բորբոքային ակնեի փուլում գտնվող դեռահասներին ասեղային մազահեռացում իրականացնելն հակացուցված է մինչև  դերմատոլոգիական լիարժեք ռեմիսիայի հասնելը։ Բացի այդ, դեռահասների հետ աշխատելիս հետխնամքի գրավոր հրահանգավորումը պետք է պարտադիր փոխանցվի նաև ծնողներին։

Հետխնամքի հիմնարար կանոնները ներառում են՝

• Սահմանափակումներ․ Առաջին 24-48 ժամվա ընթացքում բացառել ուղիղ արևի ճառագայթները, ֆիզիկական ծանրաբեռնվածությունը (քրտնարտադրությունը) և ցանկացած ոչ ստերիլ շփում մաշկի հետ։

• Հակասեպտիկ մշակում․ Մաշկը պետք է մշակել բացառապես ջրային հիմքով հակասեպտիկ լուծույթներով (օրինակ՝ Խլորհեքսիդին 0.05% կամ Հեքսիլոկ) օրական 2-3 անգամ։

• Արգելված միջոցներ․ Ինքնագլուխ չկիրառել յուղոտ քսուքներ, ցինկի մածուկ կամ հորմոնալ/հակաբակտերիալ քսուքներ առանց բժշկի նշանակման։

• Վաղ արձագանքում․ Էրիթեմայի (կարմրության), այտուցի, տեղային հիպերթերմիայի կամ ավշային հանգույցների  փոփոխության դեպքում անհապաղ դիմել դերմատոլոգի։

Ասեղային մազահեռացման վերջնական, անվտանգ և գեղեցիկ արդյունքը հավասարապես կախված է ինչպես մասնագետի տեխնիկական հմտությունից, այնպես էլ պացիենտի ու նրա ծնողների կողմից հետխնամքի արձանագրությունների ճշգրիտ պահպանումից։

Եթե ունեք հարցեր, կասկածներ կամ ցանկանում եք քննարկել նմանատիպ դեպքեր, գրեք մեկնաբանություններում։